«FlyOne Armenia» ավիաընկերությունը պատժամիջոցների տակ չի հայտնվել և կշարունակի իրականացնել Երևան-Քիշնև-Երևան չվերթերը: Այս մասին հայտնել են ավիաընկերությունից՝ Sputnik Արմենիայի գրավոր հարցմանն ի պատասխան։
Ավիաընկերությունը շաբաթական երեք անգամ թռիչքներ է իրականացնում Հայաստանից Մոլդովա և հակառակ ուղղությամբ։
«Պատժամիջոցների տակ է հայտնվել Մոլդովական «Fly One» ընկերությունը։ «FlyOne Armenia» ավիաընկերությունը մոլդովական իշխանություններից որևէ նախազգուշացում չի ստացել և կշարունակի իրականացնել Երևան-Քիշնև-Երևան չվերթերը»,-նշել են ընկերությունում:
«Fly One»-ի կայքում նշվում է, որ «FlyՕne Armenia»-ն մոլդովական ավիափոխադրողի դուստր ընկերությունն է։
Մոլդովայի տեղեկատվության և անվտանգության ծառայությունն օգոստոսի 25-ին «Fly One» ավիաընկերությունը ներառել է պատժամիջոցների ցանկում։ Դրանում հայտնվել է ոչ միայն ընկերությունը, այլև նրա ղեկավար Վլադիմիր Չեբոտարը, որը նախկինում զբաղեցնում էր հանրապետության արդարադատության նախարարի պաշտոնը։ Փաստաթղթի համաձայն՝ պատժամիջոցներն իբր կապված են օլիգարխ և դեմոկրատական կուսակցության նախկին առաջնորդ Վլադիմիր Պլախոտնյուկի գործունեության հետ, որը հուլիսին ձերբակալվել էր Հունաստանում, և դատարանը որոշել էր նրան արտահանձնել հայրենիք:
«Fly One»-ը մասնավոր ավիաընկերություն է՝ 12 ինքնաթիռով։ Այն Մոլդովայում մեծությամբ երկրորդ ավիաընկերությունն է, հիմնադրվել է 2015 թվականին։
Հիշեցնենք, որ «FlyՕne Armenia»-ն շահագործողի հավաստագիր է ստացել 2021 թվականի հոկտեմբերի 27-ին։ Ավիաընկերության պարկը բաղկացած է Airbus A320 ինքնաթիռներից։ Ընկերությունը պատկանում է «Քաղաքացիական պայմանագիր» խմբակցության պատգամավոր Խաչատուր Սուքիասյանի ընտանիքին։
Sputnik Արմենիա
