Մոտ 2 ամիս առաջ ձերբակալվել է Ավստրիայում ՀՀ հյուպատոս Աշխեն Ալեքսանյանը, և այդ լուրը փորձել են պաշտոնապես գաղտնի պահել։ Այդ մասին այսօր տեղեկություն է հրապարակել «Հրապարակ» թերթը։
Ըստ օրաթերթի տեղեկությունների` հյուպատոսին ձերբակալել են օդանավակայանում Հայաստան վերադառնալիս։ Ալեքսանյանի մոտ փաստաթղթեր են հայտնաբերել և կասկածել Ադրբեջանի օգտին լրտեսություն իրականացնելու մեջ։
«Հրապարակը» նաև գրում է, որ դրանից հետո ԱԱԾ–ն մի ամբողջ օր խուզարկություն է իրականացրել ԱԳՆ շենքում` ուսումնասիրել համակարգիչները, զննել փաստաթղթերը։
«Որոշվել է այս ձերբակալությունը գաղտնի պահել, քանի որ այն մեծ սկանդալի առիթ կարող է դառնալ։ Բանն այն է, որ որևէ մեկին դիվանագիտական կորպուսում բարձր պաշտոնի նշանակելուց առաջ ԱԱԾ–ն ստուգում է նրա անցած ուղին, կասկածելի կապերը և այլն: Նշանակումն արվում է միայն համապատասխան մանրակրկիտ ուսումնասիրությունից հետո, որի արդյունքները զեկուցում են նշանակողին։ Հիմա ստացվում է, որ կա՛մ թերացել են, ինչը պատասխանատվության հարց է առաջացնում, կա՛մ էլ նշանակողներն են աչք փակել ինչ–ինչ հանգամանքների վրա»,– գրել է թերթը։
Բացի այդ, համացանցից, բոլոր բաց աղբյուրներից ուղղակի վերացրել են Աշխեն Ալեքսանյանի վերաբերյալ տեղեկատվությունն ու անգամ նշանակման մասին պաշտոնական լուրը։
ԱԳՆ համակարգի հին աշխատակիցներից մեկը թերթի հետ զրույցում ասել է, որ շատ լավ է ճանաչում Աշխենին` նա սկզբում քաղծառայողի հաստիքի վրա է աշխատել, ապա աշխատել ԱԳՆ հյուպատոսական բաժնում և դիվանագետի կոչում ստացել, որից հետո այլևս տեղեկություն չկա նրա մասին:
Sputnik Արմենիա
