ՀՀ կառավարությունը հրապարակել է հրապարակել է Վաշինգտոնում վարչապետ Նիկոլ Փաշինյանի և ԱՄՆ նախագահ Դոնալդ Թրամփի հանդիպման շրջանակում ԱՄՆ–ի հետ ստորագրված երեք փաստաթղթերը:
Փաշինյանը օգոստոսի 28-ին հայտարարեց, որ ամերիկյան կողմի հետ համաձայնություն ձեռք բերելու դեպքում ՀՀ կառավարությունը կհրապարակի Վաշինգտոնում ստորագրված փաստաթղթերը։ Դրանից առաջ` օգոստոսի 8–ին, ՀՀ ԱԺ արտաքին հարաբերությունների մշտական հանձնաժողովի նախագահ, ՔՊ–ական պատգամավոր Սարգիս Խանդանյանը հայտարարել էր, որ ԱՄՆ նախագահ Դոնալդ Թրամփի և ՀՀ վարչապետ Նիկոլ Փաշինյանի հանդիպմանը 3 կարևոր փաստաթուղթ է ստորագրվել։ Դրանցից մեկը վերաբերում է «Խաղաղության խաչմերուկին», երկրորդը` էներգետիկ անվտանգության ոլորտում համագործակցությանը, իսկ երրորդը` բարձր տեխնոլոգիաներին ու արհեստական բանականությանը։
Հուշագրերից մեկով ԱՄՆ–ի և Հայաստանի կառավարությունները, անվերապահ աջակցություն հայտնելով ՀՀ ինքնիշխանությանը, տարածքային ամբողջականությանը և միջազգայնորեն ճանաչված սահմանների անխախտելիությանը, փոխադարձ շահագրգռվածություն են հայտնում «Խաղաղության խաչմերուկ» նախագծում ներդրումներ կատարելու, ՀՀ ենթակառուցվածքների և սահմանային անվտանգության վիճակի բարելավման համար, այդ թվում՝ փոխադարձ ներդրումների և անձնակազմի վերապատրաստման միջոցով:
Նախատեսվում է նաև համագործակցություն մաքսային հսկողության արդյունավետության բարձրացման ուղղությամբ` ներառյալ մաքսանենգության և սահմանի ապօրինի հատման դեմ պայքարը: Նշվում է, որ կողմերը նախատեսում են փոխգործակցել մի շարք ոլորտներում (այդ թվում՝ կիբեռանվտանգության)։ Ըստ փաստաթղթի` փոխգործակցություն է նախատեսվում ԱՄՆ ազգային անվտանգության դեպարտամենտի (այդ թվում՝ մաքսային և սահմանային վերահսկողության գործակալության) և ՀՀ ազգային անվտանգության ծառայության սահմանապահ զորքերի, ինչպես նաև պետական եկամուտների կոմիտեի միջև:
Մյուս հուշագրով, որը վերաբերում է էներգետիկ անվտանգության գործընկերությանը, կողմերը նախատեսում են ընդլայնել համագործակցությունը խաղաղ ատոմի ոլորտում` ներառյալ փոքր մոդուլային ռեակտորների տեխնոլոգիաները:
Նշվում է, որ կողմերը պատրաստվում են շարունակել էլեկտրաէներգետիկայի ոլորտում շուկայական բարեփոխումները և զարգացնել էներգառեսուրսների միջազգային առևտուրը։ Հուշագրով մեկ այլ առաջնահերթություն է համարվել Հայաստանի անցումը ցածր ածխածնային էներգետիկային, այդ թվում՝ վերականգնվող էներգիայի կայաններում մարտկոցների կիրառման միջոցով:
Կողմերը նաև մտադիր են համագործակցել հայկական հատուկ նշանակության էներգետիկ օբյեկտների պահպանության ուժեղացման (ներառյալ դրանց կիբեռանվտանգության բարձրացման), ինչպես նաև երկրի էլեկտրացանցերի արդիականացման հարցերում:
Արհեստական բանականության և կիսահաղորդիչների ոլորտում համագործակցության հուշագրի համաձայն` կողմերը պատրաստվում են ուսումնասիրել համատեղ նախագծերի (այդ թվում՝ պետական–մասնավոր) իրականացման հնարավորությունը, ուժեղացնել փորձի փոխանակումը արհեստական բանականության հավելվածների մշակման գործում, ինչպես նաև համատեղ իրականացնել գիտահետազոտական աշխատանք կիսահաղորդչային տեխնոլոգիաներում (միջպետական գիտական հիմնադրամի հնարավոր ստեղծմամբ):
Փաստաթղթով նախատեսվում է ԱՄՆ մասնավոր հատվածի, միավորումների և համապատասխան այլ շահագրգիռ կողմերի շրջանում բարձրացնել Հայաստանում առկա կիսահաղորդիչների էկոհամակարգի ու արտահանումների վստահելի վերահսկողության մեխանիզմների վերաբերյալ իրազեկվածությունը, ընդլայնել կիսահաղորդիչների անվտանգ մատակարարման շղթաների արտահանումների վերահսկողության միջոցները, ամրապնդել արհեստական բանականության հավելվածների և մոդելի մշակման արտահանումների արդյունավետ հսկողության միջոցները։
Նախատեսվում է ընդլայնել համագործակցությունը՝ սահմանելու, վերհանելու և կանխելու արհեստական բանականության ռեսուրսների շեղումը։
Բոլոր հուշագրերի վավերականության ժամկետը սահմանվել է մեկ տարի՝ 3 անգամ երկարաձգելու հնարավորությամբ:
Կողմերն ընդունում են, որ հուշագրերի դրույթները պարտադիր բնույթ չեն կրում և նախատեսում են դրանք իրականացնել այնպես, որ չհակասեն երկու երկրների գործող կամ ապագա իրավական պարտավորություններին:
Sputnik Արմենիա
