Վերջերս Քարվաճառում գովաբանելով իր զինված ուժերի հզորությունը՝ Իլհամ Ալիևը հայտարարեց, թե Ադրբեջանը լիակատար և անվերապահ հաղթանակ է տարել «հակառակորդի» նկատմամբ: Այնպիսի լիակատար ու անվերապահ, ինչպիսին աշխարհը չի տեսել վերջին 80 տարիներին։ Դե, այսինքն՝ Երկրորդ համաշխարհային պատերազմի ավարտից հետո։ Իլհամ Ալիև. «Մենք ստիպեցինք հակառակորդին ստորագրել կապիտուլյացիայի ակտը»…
Հետաքրքիր է, ի՞նչ փաստաթուղթ նկատի ունի Ալիևը. 09.11.2020 թ. Եռակողմ համաձայնագիրը, թե՞ հայ–ադրբեջանական վաշինգտոնյան հռչակագիրը, որի տակ իր ստորագրությունն է դրել նաև վկա Թրամփը 08.08.2025 թ.: Ավելի շուտ՝ վերջինը…
ԴԵ, ԻՍԿ ՓԱՇԻՆՅԱՆՆ ԱՅՍՕՐ ԻՐ ՁԱԽՈՂՈՒՄՆԵՐԻ ՀԱՄԱՐ ՄԵՂԱԴՐՈՒՄ Է ԱՐԴԵՆ ԲՆԱՎ ՈՉ «ՆԱԽԿԻՆՆԵՐԻՆ», ԳԵՆԵՐԱԼԱԿԱԶՍԻՆ, ԴԱՍԱԼԻՔՆԵՐԻՆ։ Այսօր նա ավելի խորն է փորում: Անկախության հռչակագրի ընդունման հերթական տարեդարձի կապակցությամբ իր «շնորհավորանքում» նա մեղադրում է արդեն Խորհրդային Միությանը, որը, իբր, հայրենասիրության սխալ մոդել է ներդրել մեր մեջ։ Պետք է ենթադրել, որ ճիշտ մոդելը, ըստ Փաշինյանի, այն է, որ հայերը երազեն այն օրվա մասին, երբ կդառնան թուրքական աշխարհի բաղկացուցիչ մասը…
Մենք համամիտ չենք։ Մեղավորը Խորհրդային Միությունը չէ, մեղավորը Նոյն է, որը սխալ տեղում խարսխեց իր տապանը, և Հայկ նահապետը, ոը խոցեց Բելին՝ նրա պայմանները պարզապես ընդունելու և երջանիկ ապրելու փոխարեն… Դե, ծայրահեղ դեպքում մեղավոր է Տիգրան Մեծը, որն իր արշավանքներով մեր մեջ սերմանեց կեղծ պատրանքներ, որոնք միայն հիմա՝ Փաշինյանի իշխանության գալուց հետո է հաջողվում աստիճանաբար ցրել և փոխարինել կենսահաստատ ճիշտ նպատակներով։ Միայն Փաշինյանի շնորհիվ ենք սկսում հասկանալ, որ հայրենասիրությունը և, ավելի ընդգրկուն՝ երջանկությունը չափվում են բացառապես ալկոհոլային փառատոնների քանակով։ Դե, և ասֆալտով, իհարկե, որը, ըստ Փաշինյանի, մեզ մոտ ավելի լավն է, քան Կոլումբիա շրջանում։
Ինչ վերաբերում է կապիտուլյացիային, ապա, իրոք, հասկանալի չէ, թե ինչու Հայաստանի և ԱՄՆ-ի միջև երեք հուշագրերի ստորագրումից ավելի քան 2 շաբաթ անց այդ հուշագրերի տեքստերը հրապարակված չեն։ Հիշեցնենք, որ ստորագրվել է հետևյալը. Փոխըմբռնման հուշագիր ՀՀ կառավարության և ԱՄՆ կառավարության միջև «Խաղաղության խաչմերուկ» նախագծի կարողությունների զարգացման ոլորտում գործընկերության մասին, Փոխըմբռնման հուշագիր ՀՀ կառավարության և ԱՄՆ կառավարության միջև արհեստական բանականության և կիսահաղորդիչների ոլորտում նորարարական գործընկերության մասին, Փոխըմբռնման հուշագիր ՀՀ կառավարության և ԱՄՆ կառավարության միջև էներգետիկ անվտանգության ոլորտում գործընկերության մասին:
Ստորագրելը՝ ստորագրել են, իսկ տեքստերը առ այսօր չկան։ Լևոն Զուրաբյանը վստահ է, որ «խաղաղության խաչմերուկի» կամ «Թրամփի ճանապարհի» մասին համաձայնագրի տեքստը չի հրապարակվում միտումնավոր, հանրությանը չբորբոքելու համար, իսկ մյուս երկու հուշագրերի տեքստերը, այսպես ասած, «պակասություն չանելու» համար են…
ՄԻՆՉԴԵՌ ՀԱՂՈՐԴԱԿՑՈՒԹՅԱՆ ՈՒՂԻՆԵՐԻ ԹՈՒՐՔ ՆԱԽԱՐԱՐԸ ՀԱՅՏԱՐԱՐՈՒՄ Է, որ «Զանգեզուրի միջանցքից» Թուրքիայի եկամուտը կգերազանցի երեք միլիարդ դոլարը: Fox News-ը պնդում է, թե «Զանգեզուրի միջանցքը» Թրամփի հաղթանակն է և Թեհրանի պարտությունը։ Reuters-ը հայտնում է, որ Երևանի և Վաշինգտոնի միջև կնքված համաձայնագիրը նախատեսում է ԱՄՆ-ի կողմից Հայաստանի տարածքի վարձակալում 99 տարով, որն այնուհետ ենթավարձակալության կհանձնվի մասնավոր ընկերության: Իրանական աղբյուրների համաձայն՝ «Զանգեզուրի միջանցքի» կամ «Թրամփի ճանապարհի» լայնությունը կկազմի 6 կմ … Եթե վերջինը ճիշտ է, ապա դա ոչ մի «ճանապարհ» էլ չէ, դա Հայաստանը երկու մասի բաժանող ամենաիսկական միջանցք է:
Հնարավոր է, որ «Թրամփի ճանապարհի» մասին հուշագրի տեքստը չի հրապարակվում Թեհրանից ու Մոսկվայից նախազգուշացումներից հետո, և Փաշինյանի թիմը փորձում է համոզել ամերիկացիներին, որ հետին թվով փոքր-ինչ փոփոխեն տեքստը, այստեղից էլ դեսպանի Քվինի ակտիվությունը։ Ամերիկացիները գուցեև դեմ չեն ճշգրտումներին՝ հասկանալով Փաշինյանի խնդիրները, բայց այ Բաքուն հանդես եկավ սպառնալից հայտարարությունների նոր չափաբաժնով։
Փաշինյանին մնում է օձի լեզու թափել՝ բոլորին գոհացնելու համար. Բաքվին, Անկարային, Վաշինգտոնին, Թեհրանին, Մոսկվային։ Դե, և ընտրողին էլ համոզելու, թե մենք ոչ մեկին ոչինչ չենք հանձնել, չենք հանձնում ու չենք հանձնելու։ Միայն ձեռք ենք բերում։
Չնայած իր բոլոր ջանքերին, չնայած փառատոններին ու ասֆալտին, ընտրողը Փաշինյանին չի հավատում։ Հաջորդ տարի ռազմական ծախսերի հնարավոր կրճատման կամ չբարձրացման մասին վերջինիս հայտարարությունից հետո, քանի որ սկսվել է «խաղաղության դարաշրջանը» և «ամեն ինչ արդեն լավ է», փաշինյանական տելեգրամ-ալիքներից մեկը համապատասխան հարցում է անցկացրել և հարցվողների 82%-ը կողմ է արտահայտվել ռազմական ծախսերի ավելացմանը… Բայց մենք արդեն գիտենք, որ քաղաքացիների այդպիսի անգիտակցության համար մեղավոր են բացառապես Նոյը, Հայկն ու Տիգրան Մեծը։
