Ռուսաստանի փոխվարչապետ Ալեքսեյ Օվերչուկի երևանյան հանդիպումների արդյունքում ձևավորվել է Եվրոպական և Եվրասիական միությունների տեխնիկական կարգավորման անհամատեղելիության մասին որոշ նրբությունների ըմբռնում: Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով՝ Օվերչուկի հանդիպումներն անցել են պրոֆեսիոնալ, անկեղծ և կառուցողական մթնոլորտում, շոշափվել են տնտեսական համագործակցության բազմաթիվ ասպեկտներ ինչպես երկկողմ, այնպես էլ ԵԱՏՄ ձևաչափով: Քննարկվել են որոշակի ապրանքատեսակների, մասնավորապես սննդի մատակարարման հարցերը, հաջողվել է հասնել որոշ նրբերանգների ընկալմանը։
Կողմերը պայմանավորվել են զարգացնել երկկողմ դաշնակցային հարաբերությունները։
«Այդ երկխոսությունը ցույց է տվել, որ Հայաստանը շահագրգռված է եվրասիական ինտեգրման մեխանիզմների ռիթմիկ գործարկմամբ։ Հայաստանյան արտադրողները զգում են Եվրասիական միությանը իրենց երկրի մասնակցության գործնական արդյունքը, հասկանում են դեպի ԵԱՏՄ երկրներ, այդ թվում՝ Ռուսաստան ապրանքների անարգել արտահանման նշանակությունը», – հավելել է Զախարովան՝ հիշեցնելով, որ վերջին 10 տարիների ընթացքում ԵԱՏՄ երկրների հետ Հայաստանի առևտրաշրջանառությունն աճել է մոտ 10 անգամ։
Նշենք, որ Հայաստանի և Ռուսաստանի ապրանքաշրջանառությունը 2024 թվականին կազմել է 12,4 մլրդ դոլար (2014 թվականին՝ ԵԱՏՄ անդամակցությունից առաջ, այն կազմում էր մոտ 1,4 մլրդ դոլար)։
Sputnik Արմենիա
