Ընտրական գործընթացներին ընդառաջ ոչ իշխանական դաշտում կոնսոլիդացիաների, նոր ֆորմատների վերաբերյալ ակտիվ կոնսուլտացիաներ են ընթանում։ Այս մասին գրում է «Հրապարակը»` հղում անելով իր աղբյուրներին։ Լրատվամիջոցի տեղեկություններով` երեկ «Օպերա սուիթ» հյուրանոցում հանդիպել են քաղաքական մի շարք ուժերի ներկայացուցիչներ։
«Մասնավորապես` ՀԱԿ փոխնախագահ Լևոն Զուրաբյանը, ԼՀԿ փոխնախագահ Դավիթ Խաժակյանը, «Դեմոկրատական այլընտրանք» կուսակցության նախագահ Սուրեն Սուրենյանցը, «Հաղթանակ» կուսակցության ղեկավար, Կենտրոնի նախկին թաղապետ Վիկտոր Մնացականյանը, «Ապրելու երկիր» կուսակցության համահիմնադիրներից Մեսրոպ Առաքելյանը և «Հայաստան» դաշինքի նախկին պատգամավոր, «Իզմիրլյան ԲԿ» տնօրեն, «Հայոց տուն» նախաձեռնության հիմնադիր անդամ, պրոֆեսոր Արմեն Չարչյանը։ Մենք պարզեցինք, որ այս խումբը նախկինում էլ է պարբերաբար հանդիպել` առաջիկա ընտրություններին միասնական ճակատով մասնակցելու նպատակով, բայց նոր ֆորմատը դեռ գլուխ չի գալիս»,– գրել է լրատվամիջոցը:
Ըստ «Հրապարակի»` արտախորհրդարանական ուժերի օրակարգում երեկ եղել է նոյեմբերի 16-ին Վաղաշապատի ՏԻՄ ընտրություններին մասնակցելու հարցը, սակայն վերջնական որոշում դեռ չի կայացվել։
«Քանի որ իշխանությունն Էջմիածնում նորմալ թեկնածու չուներ, որոշեցին համայնքը կրկին խոշորացնել` միավորելով Խոյի հետ, այն հույսով, որ խոյեցիները կքվեարկեն իրենց նախկին համայնքապետի օգտին: Սակայն Մեխակյանը կարծես չի արդարացնում այդ հույսերը։ Ասում են՝ Փաշինյանը Մեխակյանին հանձնարարել է վեհափառի դեմ մարդ հավաքագրել Արմավիրից, սակայն որոշ ժամանակ անց նա հասկացել է, որ անզոր է կատարել շեֆի կամքը, զեկուցել է և լուտանքների արժանացել»,– գրված է հրապարակման մեջ։
Մարզի ընդդիմադիր շրջանակները, ըստ լրատվամիջոցի, կարծում են, որ մեծ շանսեր ունեն հաղթելու, եթե լավ պատրաստվեն։
«Առաջադրվելու մտադրություն ունի Սևակ Խաչատրյանը (հայտնի Սաքուլիկը), որը ժամանակին ՀՊՏՀ ուսխորհրդի նախագահն էր, ապա՝ պրոռեկտորը, հիմա Էջմիածնի ավագանու ընդդիմադիր խմբակցության ղեկավարն է: Նա նաև Ռոբերտ Քոչարյանի որդու մտերիմներից է և առաջադրվելու է անցած տարի ընկերների հետ հիմնած «Առաջ» կուսակցությամբ: Հնարավոր է` ՀՅԴ-ի հետ դաշինք կազմեն»,–գրում է կայքը։
Կայքի տեղեկություններով` «ՀայաՔվեն» է նաև ուզում մասնակցել, թեկնածուն տարածքային կառույցի ղեկավար Գագիկ Հովհաննիսյանն է: Մասնակցելու է նաև Վանեցյանի «Հայրենիքը», իսկ ՀՀԿ-ն դեռ չի որոշել։
Sputnik Արմենիա
