Երուսաղեմի հայ համայնքը բողոքի ակցիա է իրականացրել Հայոց պատրիարքարանի որոշման դեմ, որը վերաբերում է Երուսաղեմի Հին քաղաքի հայկական թաղամասում՝ «Կովերի այգի» տարածքի վերաբերյալ իսրայելական Xana Gardens ընկերության հետ երկրորդ հողային գործարքի կնքմանը։ Այս մասին հայտնում է «Թաղամասի փրկության շարժումը»։
Գիշերը հայկական կազմակերպությունների ներկայացուցիչները հավաքվել են Սուրբ Հակոբյանց մայր տաճարի բակում՝ Պատրիարքարանի մուտքի առաջ։ Ակցիան սկսվել է համատեղ աղոթքով։
«Մենք պահանջում ենք պատասխաններ։ Մեր երեխաների, մեր ապագայի համար», – հայտարարել են բողոքի ակցիայի մասնակիցները։
Նրանք պնդում են, որ Պատրիարքարանը մտադիր է գործընթացը շարունակել գաղտնի՝ համայնքի շահերին հակառակ։ Համայնքի անդամների գնահատմամբ՝ նոր փաստաթուղթը դեռ ավելի վտանգավոր է, քան 2021 թվականին կնքված հողային գործարքը, որի համաձայն՝ «Կովերի այգին» 98 տարով փոխանցվել էր իսրայելական ընկերությանը։
Հիշեցնենք, որ 2023թ․ հունիսին հայտնի էր դարձել Երուսաղեմի Հին քաղաքի հայկական թաղամասի մի մասի՝ 99 տարով վարձակալության հանձնման մասին «առեղծվածային հրեական ծագումով ավստրալիացի գործարարին՝ էլիտար շինարարության համար»։
Երուսաղեմի հայ համայնքը 2024թ․ փետրվարի 18-ին դատարան էր ներկայացրել հայց՝ վարձակալության պայմանագիրը չեղյալ հայտարարելու պահանջով։
2025թ․ օգոստոսին հայկական կազմակերպությունները զգուշացրել էին Երուսաղեմի Հայոց պատրիարքարանի՝ Xana Gardens-ի հետ նոր գործարք կնքելու մասին։ Համայնքի տվյալներով՝ Պատրիարքարանի և Xana Gardens-ի միջև պատրաստվում է երկրորդ համաձայնագիր՝ կնքված գաղտնի, առանց համայնքի հավանության և հրապարակված միայն մասամբ։
Armenia Today
