Գյումրիում տեղակայված ռուսական ռազմաբազան դուրս բերելու պահանջով օրերս տեղի ունեցած բողոքի ակցիաների մասին Alpha News-ը զրուցել է «Մայր Հայաստան» շարժման ներկայացուցիչ, քաղաքագետ Դերենիկ Մալխասյանի հետ:
Նա նշել է, որ «Մայր Հայաստան»-ը ռուսական ռազմաբազան դիտարկում է որպես Հայաստանի անկախության և անվտանգության կարևորագույն երաշխիքներից մեկը: «Այսպես կոչված արևմտամետներն իրենց գործողություններով ցույց են տալիս, որ ավելի շատ համահունչ են թուրքական և ադրբեջանական շահերի հետ, երբ հանդես են գալիս ռազմաբազան դուրս բերելու կոչերով»,- ասել է նա:
Մալխասյանի խոսքով՝ Գյումրիում դեմ են նման արկածախնդիր քայլերին: «Մեր ակցիաներով ապացուցեցինք, որ հանրային կարծիքը փակեց արևմտամետների բերանը։
Չեմ զարմանա, եթե պարզվի, որ Թուրքիայի նախագահն է հորդորել ՀՀ իշխանություններին զբաղվել ռուսական ռազմաբազայով: Դեպի Հարավային Կովկաս, Միջին Ասիա Թուրքիայի էքսպանսիայի համար միակ խոչընդոտը Հայաստանում տեղակայված ռազմաբազան և ռուսական գործոնն է»,- հավելել է քաղաքագետը:
