Ավստրալիան վտարում է երկրից Իրանի դեսպան Ահմադ Սադեղիին, ինչպես նաև փակում է իր դեսպանատունը Իսլամական Հանրապետությունում։ Այս մասին, ինչպես հաղորդում է ՌԻԱ Նովոստին, ասվում է Ավստրալիայի վարչապետ Էնթոնի Ալբանեզեի կայքում հրապարակված հայտարարության մեջ։
Նշվում է, որ Ավստրալիայի անվտանգության և հետախուզական ծառայությունը, երկրի դաշնային ոստիկանության հետ համատեղ, հետաքննություն է անցկացրել Ավստրալիայում հրեական համայնքի դեմ մի շարք հակասեմական հարձակումների կապակցությամբ, որի ընթացքում պարզվել է, որ դրանցից առնվազն երկուսն աջակցություն են ստացել Իրանի կառավարությունից։
«Մեր հասարակության վրա այս հարձակումները բացարձակապես անընդունելի են, և Ավստրալիայի կառավարությունը վճռական գործողություններ է ձեռնարկում: Մենք տեղեկացրել ենք Ավստրալիայում Իրանի դեսպանին (Ահմադ Սադեղի – խմբ.), որ նա և ևս երեք դիվանագետներ կվտարվեն երկրից: Մենք կասեցրել ենք մեր դեսպանատան աշխատանքը Թեհրանում, և մեր բոլոր դիվանագետներն այժմ անվտանգ կերպով գտնվում են երրորդ երկրում», – ասվում է հայտարարության մեջ:
Դրանից բացի հայտնվում է, որ Ավստրալիայի կառավարությունը կընդունի օրենսդրություն, որը թույլ կտա Իրանի Իսլամական հեղափոխության պահապանների կորպուսը ներառել ահաբեկչական կազմակերպությունների ցանկում:
Sputnik Արմենիա
