Նոր ստեղծվող ուժի համար առաջնային է բռնի տեղահանված արցախցիների արժանապատիվ կյանքը։ Այսօր լրագրողների հարցին ի պատասխան այսպես արձագանքեց գործարար Սամվել Կարապետյանի եղբորորդին՝ «Տաշիր գրուպ» հոլդինգի ղեկավարի տեղակալ Նարեկ Կարապետյանը՝ անդրադառնալով հարցին, թե արդյոք մտադիր են չեղարկել Արցախի հետ կապված ՀՀ վարչապետ Նիկոլ Փաշինյանի կողմից ստորագրված փաստաթղթերը։
«Առաջնային պետք է լուծվի արցախցիներին բնակֆոնդով և աշխատանքով ապահովելու հարցը։ Մյուս հարցերը ժամանակի ընթացքում կներկայացնենք, բայց բոլորս գիտենք խնդրի բարդությունը»,– նշեց Կարապետյանը։
Խոսելով խաղաղության օրակարգի մասին՝ Կարապետյանը նշեց, որ խաղաղության օրկարգը ՀՀ–ի համար վերջին 35 տարվա ընթացքում առաջնային է, մնում է հասկանալ` իրական խաղաղություն է, թե ոչ։
«Մեր աշխատանքային խումբը կհետևի գործընթացներին, քանի որ կան ստորջրյա շատ հարցեր, որոնք դեռ հանրությանը հայտնի չեն։ Ուսումնասիրության արդյունքում մենք հանդես կգանք մեր տեսլականով»,– շարունակեց Նարեկ Կարապետյանը։
Ավելի վաղ հայտնել էինք, որ Նարեկ Կարապետյանն այսօր հայտարարեց «Մեր ձևով» կամավորական շարժման ստեղծման մասին։
Հավելենք, որ ՀՀ ներքին գործերի նախարարության միգրացիայի և քաղաքացիության ծառայության տվյալներով՝ 2023 թվականի սեպտեմբերից հետո Արցախից 115 365 մարդ է բռնի տեղահանվել։ Նրանցից շուրջ 4400–ը ՀՀ քաղաքացիություն են ստացել։
Sputnik Արմենիա
