ՀՀ ՊՆ դիրքերից մեկում զինծառայողի վնասվածք ստանալու դեպքով քրեական վարույթ է նախաձեռնվել ծառայությունից խուսափելու հոդվածով։ Տեղեկությունը Sputnik Արմենիային հայտնեցին ՀՀ քննչական կոմիտեից։
«Դեպքի առթիվ նախաձեռնվել է քրեական վարույթ՝ Քրեական օրենսգրքի 527-րդ հոդվածի 1-ին մասով (առողջությանը վնաս պատճառելու (անդամախեղելու), հիվանդության սիմուլյացիայի կամ ապօրինի այլ եղանակով զինվորական ծառայությունից խուսափելը կամ դրա առանձին պարտականությունների կատարումը դադարեցնելը)»,– նշեցին ՔԿ–ից։
Կատարվում է նախաքննություն։
Հիշեցնենք` shamshyan.com-ն ավելի վաղ հայտնել էր, որ ՀՀ ՊՆ դիրքերից մեկում կրակոց է հնչել, զինծառայողներից մեկը հրազենային վնասվածք է ստացել։ Ըստ ՊՆ–ի` զինծառայողը ենթարկվել է վիրահատական շտապ միջամտության, տեղափոխվել Կենտրոնական կլինիկական զինվորական հոսպիտալ, նրա կյանքին վտանգ չի սպառնում։ shamshyan.com–ի տեղեկություններով` դեպքը տեղի է ունեցել օգոստոսի 25-ին Գեղարքունիքի մարզում։ Զինծառայողը Արարատի մարզից է։
