Թուրքիայի նախագահ Ռեջեփ Թայիփ Էրդողանը հայտարարել է, որ այսպես կոչված «Զանգեզուրի միջանցքի» նախագծի իրականացումը կբարձրացնի Թուրքիայի, Հայաստանի և Ադրբեջանի միջև տնտեսական համագործակցության մակարդակը, հայտնում է «ՌԻԱ Նովոստին»:
Նա նշել է, որ 224 կմ երկարությամբ Կարս-Իգդիր երկաթուղին այս նախագծի հիմքն է և կլինի երկկողմանի ու էլեկտրաֆիկացված: Գիծը տարեկան կտեղափոխի 5,5 մլն ուղևոր և 15 մլն տոննա բեռ:
«2,4 մլրդ եվրո արժողությամբ նախագծի շահագործմամբ Չինաստանից Մեծ Բրիտանիա միջազգային առևտրային գիծը կդառնա ավելի արդյունավետ»,- մեջբերում է գործակալությունն Էրդողանի խոսքերը:
Օգոստոսի 22-ին Թուրքիայում տեղի էր ունեցել Կարս-Իգդիր-Արալըք-Դիլուջու երկաթուղու հիմնարկեքի արարողությունը: Թուրքիայի տրանսպորտի նախարար Աբդուլքադիր Ուրալօղլուն նախագիծն անվանել էր «Զանգեզուրի միջանցքի իրականացման ուղղությամբ ամենաակնհայտ քայլերից մեկը»:
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի:
Armenia Today
