ՀՀ վարչապետ Նիկոլ Փաշինյանը Անկախության հռչակագիրն անվանել է «կոնֆլիկտային» և որակել որպես «ԽՍՀՄ-ի ամբիցիաների հարավ-արևմտյան ուղղություն»։ Այս մասին նա նշել է Անկախության հռչակագրի ընդունման օրվա առթիվ իր ուղերձում։
Փաշինյանը նշել է, որ հայրենասիրության այս մոդելը «կաթիլ-կաթիլ, բայց հետևողականորեն մեզանում սերմանվել էր 1950-ականներից՝ երկաթյա վարագույրի հաստատման և սառը պատերազմի մեկնարկի միջավայրում»։ Նրա կարծիքով, այդ մոդելը նախատեսված էր ապահովելու Հայկական ԽՍՀ-ում գոյություն ունեցող հայրենասիրական ընկալումների արտահանումը հանրապետության տարածքից՝ նրա տեղային արտահայտումը թույլ չտալու համար։
Ըստ նրա՝ ԽՍՀՄ-ի ձևավորած այդ սոցիալ-հոգեբանությունն 90-ականներին փոխանցվել էր Հայաստանում ձևավորված սերունդներին: Փաշինյանի կարծիքով՝ դրա խորքային և ենթագիտակցական նպատակը ՀՀ անկախ պետության գոյության ռազմավարական անհնարինությունն էր, որովհետև «շուրջանակի կոնֆլիկտային ենթատեքստ ունեցող երկիրը չի կարող իրական անկախություն կառուցել»։
«Այս գաղափարաբանությունը տասնամյակներով է սերմանվել գրքերի, ֆիլմերի, պիեսների/թատերական ներկայացումների միջոցով և այսպես ձևավորված մեր սոցիալ-հոգեբանությունն է, որ հանգեցրեց Ղարաբաղյան շարժմանը»,- ասված է ուղերձում։
Փաշինյանը կրկնել է իր հայտարարությունը, որ հայ ժողովուրդը չպետք է շարունակի ղարաբաղյան շարժումը, քանի որ դա նշանակում է «հանրապետության անկախության ոչնչացում»։
«Վարչապետի պաշտոնում հասանելի տեղեկատվության և իրականության ամբողջական ու համապարփակ վերլուծությունն ինձ բերեց այն աներեր համոզման, որ մենք չպետք է շարունակենք Ղարաբաղյան շարժումը, քանզի դա նշանակում է ՀՀ անկախության վերացում»,- շեշտել է Փաշինյանը։
Նա ընդգծել է նաև, որ 2020 թվականին պատերազմից խուսափելու համար զիջումների չի գնացել, քանի որ բոլոր սպառնալիքները և կախվածությունները անհամաչափորեն կմեծանային՝ հանգեցնելով Հայաստանի անկախության և պետականության կորստի։
«Մենք որդեգրեցինք Հայաստանի անկախությունը պահպանելու և այդ անկախությունն իրական դարձնելու ռազմավարություն, և այդ ռազմավարության արտահայտությունն Իրական Հայաստանի գաղափարախոսությունն է, որի պայմաններում հնարավոր դարձավ խաղաղությունը Հայաստանի և Ադրբեջանի միջև, որի պայմաններում հնարավոր դարձավ իրական երկխոսությունը Թուրքիայի հետ»,- հավելել է վարչապետը։
Հունիսի 6-ին Ալիևն անդրադարձել էր խաղաղության պայմանագրին՝ նշելով, որ անհնար է այն կնքել, եթե Հայաստանի սահմանադրությունը չփոխվի։
Հուլիսի 20-ին Ադրբեջանի նախագահ Իլհամ Ալիևը հայտարարել էր, որ Հայաստանի հետ խաղաղության պայմանագրի տեքստի 80-90 տոկոսն արդեն համաձայնեցված է։ Նա ընդգծել էր, որ Երևանը պետք է արձագանքի համաձայնագրի վերաբերյալ Բաքվի առաջարկներին և համատեղ դիմի ԵԱՀԿ-ին՝ Մինսկի խումբը լուծարելու համար։
Օգոստոսի 14-ին մամուլը գրել էր, որ Անկախության հռչակագրին հղումից հրաժարվելու պահանջը կատարելու համար Սահմանադրական խորհուրդն առաջիկայում նոր Սահմանադրություն գրելու ակտիվ նիստեր է անցկացնելու։
Armenia Today
